50 млн теңге Арал ауданының арналарын, жайылымдарын суландыруға бағытталды

Арал ауданы биыл құрғақшылықтан зардап шекті. Бүгін болашақта жағдайды болдырмау үшін шаралар қабылдануда. Жайылымдарды су басу, ұңғымаларды игеру жұмыстары жүргізілуде, деп хабарлайды Қызылорда облысы әкімінің баспасөз қызметіне сілтеме жасап World of NAN.

Өңір басшысы Гүлшара Әбдіқалықова жақында Арал ауданына барып, бірқатар шаруа қожалықтарының иелерімен, ақсақалдармен кездесті. Әкім құрғақшылықтың алдын алу бойынша жүргізіліп жатқан жұмыстар туралы айтып, шаруа қожалықтарының қысқа дайындық барысымен танысты.

Өз сөзінде ол резервтен бөлінген 250 миллион теңгенің 50 миллион теңгесі арналарды, жайылымдарды, шабындықтарды суландыруға бағытталғанын атап өтті.

Г.Әбдіқалықованың айтуынша, Қызылжар елді мекеніндегі «Бектау» арнасын игеру жұмыстары басталып, Аманөткел елді мекеніндегі «Бұрмақұлақ» учаскесінде өзен арнасындағы жайылымдық жерлерді су басу жұмыстары аяқталды. Сонымен қатар, Мергенсай елді мекеніндегі «Үш шоқы» жайылымдық алқабында су астына 1 ұңғыма қазу жұмыстары жүргізілді.

«Қазіргі таңда Қосаман, Ақбасты елді мекендерінде су ұңғымалары мен Құла арналарын, оқпан қазу жұмыстары басталды. Бүгінгі таңда Дария суы көтеріліп, «Қамбаш» және Ақшатау көлдерінің жүйесіне көп мөлшерде су келіп жатыр. Бұл жұмыстардың толық аяқталуы менің жеке бақылауымда болады», - деді облыс әкімі.

Аудан әкімі Серік Сермағамбетов ағымдағы жағдай туралы баяндады. Бүгінгі күні аудан бойынша қыстауға 114,1 мың бас шартты мал басы дайындалуда, 184,6 мың тонна шөп пен 37,6 мың тонна жемге қажеттілік анықталды.

«Қазіргі уақытта ауданға 79007 тонна, өткен жылдан бастап – 4512 тонна, біздің аумақтан – 41098 тонна тасымалданды. Яғни, бүгінгі күні ауданға қажетті 184640 тоннаның 124617 тоннасы қамтамасыз етілді. Сонымен қатар, солтүстік өңірлерде қысқы азықтарды сатып алу мақсатында ҚР АШМ келісімі бойынша «Азық-түлік корпорациясы» ҰК» АҚ арқылы азықтарды жеңілдетілген бағамен сатып алуға тапсырыс берілді, қазіргі уақытта операторлар анықталды. Сонымен қатар, көршілес Ырғыз ауданының шабындықтарынан шөп қорын жинау бойынша меморандум жасалды», – деді аудан әкімі.

Ағымдағы жылы облыс әкімдігінің бастамасымен тауар өндірушілердің мал азығына арналған шығындарын ішінара субсидиялауға республикалық бюджет резервінен 1,7 миллиард теңге бөлінді, мал азығына бөлінген қаражат игерілуде. Қуаңшылыққа байланысты Болат Өтемұратов Қоры Арал ауданына 263 миллион теңге көлемінде көмек көрсетті. Бөлінген қаражат мал азығын, жемшөп дайындауға арналған ауыл шаруашылығы техникасын сатып алуға бағытталды. Сонымен қатар, Кіші Арал теңізіне су ағыны қосылды.

Өңір басшысы аудан әкімі мен шаруаларға жемшөпті уақытылы дайындауды және мәселені тұрақты бақылауға алуды тапсырды.

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.