Мамырда керек су маусымда берілді – қызылордалық фермерлер су мәселесін көтерді

Қызылорда облысындағы шаруалар «Атамекен» Палатасының отырысында су тапшылығынан зардап шегіп отырғанын айтып, жанайқайын бөлісті. Шаруашылыққа қажет су дәл уақытында беріліп жатқан жоқ, деп хабарлайды World of NAN.

Облыстық Кәсіпкерлер палатасы жанындағы Агроөнеркәсіп кешені кеңесінің кезекті отырысы аяқ су мәселесіне арналды. Күрішшілер егінге қажет суды дәл қажет сәтінде ала алмай отырғанына алаңдаушылық білдірді.

«Мамырда керек су маусымда берілді. Енді шілдеде су сұрасақ тамызда береміз деп отырсыздар. Каналымызда су жоқ қазір, кеуіп кетті. Егініміз күйіп жатыр ғой. 125 гектарға еккен күрішімізді көк күйінде тастадық, күйіп кетті. Енді қалған егінімізге қауіп төніп тұр», – деді Тұрмағамбет ЖШС директоры Нұржан Пірмантаев.

Салаға жауапты мамандар жағдайды бақылауда ұстап отырғандарын, берілетін су көлемін реттеп отырғандарын айтумен болды.

«Су тапшылығын еңсеру үшін күріштіктің көлемін азайту керек деген пікірлерді жиі естиміз. Әрине, суды үнемдеу маңызды. Алайда күрішсіз Қызылорда облысының экологиялық ахуалы нашарлайды. Топырақ тұзданып, «жарамсыз оазиске» айналады. Өйткені Сыр топырағының қатты тұздануын күріш егу арқылы шаймаса, аса тұзды топырақта басқа дақылдардан өнім алу мүмкіндігі өте төмен. Бұл – мамандардың тұжырымы. Осы салада 550-дей ірілі-ұсақты шаруашылықтарда 9500 –ден астам маусымдық және тұрақты жұмысшылар жұмыс істейді. Ауыл халқының 45-50 пайызы осы саладан нәпақасын тауып отыр. Оны да ескеруіміз керек», – деді Қызылорда облысы кәсіпкерлер палатасының диреторы Пірмұхаммед Сыздықов.

Су тапшылығының салдары егіншілерге ғана емес, мал ұстап отырған кәсіп иелеріне де зардабын тигізіп жатыр.

«Жауапты мамандар шабындыққа берілетін судың мәселесін де ескергенін сұраймыз. Мысалы Тереңөзектегі Асқар Тоқмағамбетов ауылында биыл төртінші жыл шабындықта су жоқ. Өз көзіммен барып көрдім», – деді «Сыр сыйы» шаруа қожалығының жетекшісі Нұрлан Биманов.

Жиын соңында кәсіпкерлер суды үнемдеу үшін жауапты мекемені анықтап, қараусыз қалған каналдарды балансқа алуды, сондай-ақ берілетін суды қадағалайтын арнайы комиссия құруды ұсынды.

Отырысқа егін және мал шаруашылығымен айналысатын кәсіпкерлер мен облыстық ауылшаруашылығы және жер қатынастары басқармасының, «ҚазСуШар» ШЖҚ РМК облыстық филиалының, Арал-Сырдария бассейндік инспекциясының өкілдері қатысқан.

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.