Qaztrade отандық экспорттаушыларды БАӘ-де өтетін сауда миссиясына қатысуға шақырды

«QazTrade» сауда саясатын дамыту орталығы» қазақстандық өндірушілердің Біріккен Араб Әмірліктерінің нарығына шығуына көмектеспек. 27-29 ақпан аралығында Дубай қаласында Қазақстаннан тауар өндірушілер мен қызмет көрсетушілердің сауда миссиясы өтеді. Бұл туралы World of NAN порталы «QazTrade» орталығының баспасөз қызметіне сілтеме жасай отырып хабарлайды.

Әмірліктердің жылдам дамып келе жатқан нарығы қазақстандық экспорт үшін басым бағыттардың қатарына кіреді және тауар өндірушілер үшін қызығушылық тудырады. Сатып алушылардың артықшылықтарын зерттеу нәтижелері БАӘ тұрғындарының 53%-ы экологиялық таза өнімдерді таңдайтынын көрсетеді. Осы фактіні ескере отырып, отандық табиғи тамақ өнімдері мен сусындарды өндірушілер Парсы шығанағы еліне жеткізуді арттыра алады.

«Тамақ саласы мен ауыл шаруашылығынан басқа металлургия, IT және жаңа технологиялар секторлары айтарлықтай әлеуетке ие. Естеріңізге сала кетейік, Дубайдағы сауда миссиясының қорытындысы бойынша 2023 жылы биоқосымшаларды, ауыл шаруашылығы өнімдерін, минералды суды, кондитерлік өнімдерді, сондай-ақ БАӘ нарығына IT-қызметтерді жеткізу туралы келісімге қол жеткізілді», - дейді сауданы дамыту орталығы.

Сауда миссиясы барысында тәжірибе алмасу және байланыстарды кеңейту үшін қазақстандық кәсіпкерлердің араб бизнесі өкілдерімен екіжақты B2B келіссөздер және көшпелі кездесулер өткізу жоспарланған.

Ұйымның хабарлауынша, іскерлік іс-шара аясында «QazTrade» АҚ қатысушылардың тұруына және болатын еліндегі трансферге шығыстарды жабады. Қатысу мәселелері бойынша +7 775 230 09 82 (Whatsapp) телефоны арқылы хабарласуға болады. Қатысуға өтінімдер 2024 жылғы 12 ақпанға дейін сағат 10:00 дейін қабылданады екен. Тіркелу сілтемесі: https://forms.gle/dvkNWXy3zawDBH1r9

Іс-шара Сауда және интеграция министрлігі мен «QazTrade» сауда саясатын дамыту орталығы» қолдауымен өтеді.

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.