ҚТЖ жүк жөнелтуді нақты жоспарлауға шақырады

«Қазақстан Темір Жолы» компаниясы қыркүйек айына арналған жүк тасымалы жоспарын жариялады. Компанияның айтуынша, осы айда ҚТЖ желілері арқылы 29 млн тонна жүк тасымалданбақ. Бұл жөнінде World of NAN порталы ҚТЖ-ның баспасөз қызметіне сілтеме жасай отырып хабарлайды.

Тамыз айында 26 млн тоннадан астам жүк тасымалданған, бұл өткен жылдың сәйкес көрсеткішінен 8%-ға жоғары. Тасымалдаудың тұрақты болуын қамтамасыз ету үшін ҚТЖ жүк жөнелтушілерді тасымалдауды нақты жоспарлауға шақырады.

Жүктерді тасымалдау қағидаларында жүктерді тасымалдауды жоспарлаудың 2 түрі көзделген: тасымалдауды айлық жоспарлау (негізгі жоспар) және жоспардан тыс тасымалдау (қосымша жоспар).

Теңіз порттары мен құрлықтағы шекаралық өткелдер арқылы «үшінші елдерге» тасымалдау кезінде өтінім жоспарланған ай басталғанға дейін 20 күн бұрын беріледі. ТМД елдеріне, Литваға, Латвияға, Эстонияға және Қазақстан Республикасы бойынша облысаралық қатынаста тасымалдау кезінде негізгі жоспар бойынша өтінімдер жоспарланған ай басталғанға дейін 14 күн бұрын қабылданады.

Автоматтандырылған жүйе бойынша өтінімдер алдағы айға тасымалдау көлемін келісу үшін Теміржол көлігі жөніндегі орталық кеңеске (ТМД және Балтық елдеріне қатысушы елдердің Теміржол көлігі мәселелеріндегі уәкілетті орган) беріледі.

«Жүкті тасымалдаудың қосымша жоспарлары белгіленген тәртіппен қаралатын болады. Тасымалдаушы теміржол желісінің өткізу қабілеттілігінің шектеулі болуына және басқа да себептерге байланысты қосымша жоспарларды келісуден бас тартуы мүмкін. Бас тартудың барлық жағдайлары бойынша жүк жөнелтушілер хабардар етіледі», - дейді компанияның хабарламасында.

Өткен айларда қазақстандық астық экспортшылары ҚТЖ-ның нарықтағы монополияны пайдаланып, шарттарды жиі өзгертетінін, жүкті уақытылы жөнелтуге кедергілер келтіретінін айтып шағымданған болатын.

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.