Үкімет күріш пен мақта егіс алқаптарын азайтуды тапсырды

Қазақстан Министрлер кабинетінің басшысы Асқар Маминнің төрағалығымен өткен Үкімет отырысында су ресурстарын тиімді пайдалану мәселелері қаралды, деп хабарлады Премьер-Министрдің баспасөз қызметіне сілтеме жасап World of NAN.

Бүгінде елімізде 2025 жылға қарай суармалы жерлер алаңын 2,2 млн гектарға дейін, ал 2030 жылға қарай 3 млн гектарға дейін кеңейту міндеті тұр. Сонымен қатар, су ресурстарына деген қажеттілік өсетін болады, бұл суды тиімді пайдалануды, жаңа технологияларды енгізуді, саланы цифрландыруды талап етеді.

Осыған байланысты таяу бесжылдық кезеңде ұзындығы 2,3 мың км 120 арнаны қайта құру жөнінде шаралар қабылданып, жалпы көлемі 1,7 млрд текше метр 9 ірі су қоймасы салынады. Өңірлік деңгейде жайылымдардағы қолданыстағы гидротехникалық құрылыстарды, құдықтар мен ұңғымаларды жаңғырту, жөндеу және оларға қызмет көрсету жүргізілетін болады. Тек автоматтандырылған бөлу және тасымалдау есебінен судың артық шығыны жыл сайын 1,2 текше шақырымға қысқартылатын болады.

«Жаңа су қоймалары мен арналарды салу және жұмыс іске қосылғандарын жаңғырту, сондай-ақ су үнемдеу технологияларын қолдану 6,4 текше км көлемінде қосымша жалпы су жинауды қамтамасыз ететін болады. Бұл шаралар "Жасыл Қазақстан" ұлттық жобасында да көрініс тапты», – деп атап өтті А. Мамин.

Ауыл шаруашылығы, экология, геология және табиғи ресурстар министрліктеріне өңірлердің әкімдіктерімен бірлесіп, бір ай мерзімде 2025 жылға дейін суармалы алаңдарда су үнемдеу технологияларын енгізу жөніндегі өңірлік жол карталарын әзірлеу, сондай-ақ жайылымдардағы қолданыстағы гидротехникалық құрылыстарды, құдықтар мен ұңғымаларды жаңғырту жөнінде шаралар қабылдау тапсырылды. Сонымен қатар, Ауыл шаруашылығы министрлігіне Алматы, Түркістан және Қызылорда облыстарының әкімдіктерімен бірлесіп, ылғал сүйгіш дақылдар – күріш пен мақта егістіктерінің алқаптарын кезең-кезеңімен төмендету мәселесін пысықтау тапсырылды.

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.