Астық тұқымы бойынша Қазақстан Ресейге 60%-ға тәуелді

Қазақстанда ауыл шаруашылығы дақылдарының жаңа сұрыптарын және будандарын қазіргі заманғы молекулярлық зерттеу әдістері арқылы жасайтын жобаны іске асыруды С. Сейфуллин атындағы Қазақ агротехникалық университетінің ректоры Ахылбек Күрішбаев ұсынды

Ғалымның пікірінше, соңғы 10 жылда елдегі тұқым өсіру шаруашылығы құлдырауда. Нәтижесінде сапалы тұқым материалына қол жеткізе алмай, фермерлер өз жұмысынан лайықты өнім ала алмай, тауарлық астық тұқымын себуге мәжбүр. Ал аграрлық сала тұтастай дами алмауда, өйткені еңбек өнімділігі төмен күйінде қалып отыр.

 «Мен ұлы ғалым, «жасыл революцияның» әкесі, Нобель сыйлығының лауреаты Норман Борлоугтың дәрістеріне қатысып, тыңдай алдым. Ол «жасыл революция» болған елдердің ауыл шаруашылығындағы ілгерілеу селекцияның қарқынды дамуы, ауыл шаруашылығы дақылдарының үздік сұрыптарын жасау арқылы басталғанын айтты», - деп жазды Ақылбек Күрішбаев өзінің Facebook-тегі парақшасында.

ҚазАТУ ректоры қазіргі уақытта экономиканың көптеген секторлары пандемияға байланысты  құлдырау кезеңін өткізіп жатқанын еске салды. Ал осындай дағдарыс жағдайында тұрақтылық тек АӨК саласында бар. Осы саладағы өнімдердің көрсеткіші үнемі артуда.

Ауа-райы әлі де жақсы болып тұр, ал егін былтырғы жылдан жоғары болады. Егер фермерлер құрғақшылық пен түрлі өсімдік ауруларына төзімді жоғары сапалы тұқымдармен қамтамасыз етілсе, онда өнім әлдеқайда жоғары болуы мүмкін. Сондықтан тұқым шаруашылығы мен селекция бүкіл саланың өсуіне әсер етуі мүмкін. Бұл үшін үлкен ғылыми бағдарлама қажет.

 «Аталған салаға керекті қаражатты бөліп, тәжірибелік база құру қажет. Шетелдік ғалымдарды шақыртуға болады. Осылайша бір рет ақша жұмсаймыз, бірақ оның орнына жергілікті ауа-райына бейімделген жоғары өнімді сұрыптарды аламыз. Осылайша өнім сапасы артады, мал шаруашылығы үшін жемшөп базасы жақсарады», - деп атап өтті Ақылбек Күрішбаев.

ҚазАТУ ректорының мәліметінше, бүгінгі таңда қазақстандық фермерлер дәнді дақылдар тұқымының 60% - ын Ресейден әкелуге мәжбүр. Өйткені жергілікті тұқым өсірушілер сапалы тұқым түрлерін ұсына алмауда. Осылайша, іс жүзінде еліміздің ғылымына жұмсалуға тиіс қаражатты, Қазақстан көрші елдің ғылым саласын дамытуға жұмсап отыр.

Ақпарат көзі: eldala.kz

Смотрите больше интересных агроновостей Казахстана на нашем канале telegram, узнавайте о важных событиях в facebook и подписывайтесь на youtube канал и instagram.